Mancomunidad de Malerreka

Malerrekako Zerbitzuen Mankomunitateak Jubiloteka proiektua bultzatzen du, adinekoen zahartze aktiboa eta autonomia sustatzeko

Malerrekako Zerbitzuen Mankomunitateak gure bailarako adineko pertsonen ongizatea eta parte-hartze aktiboa sustatzen jarraitzen du “Malerrekako Jubiloteka” proiektuaren bidez. Ekimen komunitario honek zahartze aktiboa, osasungarria eta autonomoa bultzatzen du, mendekotasunaren prebentziorako neurri gisa.

Programa hau Nafarroako Gobernuarekin elkarlanean garatzen da, 2025eko “autonomia sustatzeko eta mendekotasuna prebenitzeko programetarako dirulaguntzen deialdiaren” barruan, eta helburua du topagune, ikasketa eta laguntza espazioak eskaintzea, non adineko pertsonek gaitasun fisikoak, kognitiboak, emozionalak eta sozialak mantendu ahal izango dituzten.

Baliabide ibiltari bat sei udalerritan

Jubilotekak sei herritan funtzionatzen du —Donamaria, Bertizarana, Ezkurra, Sunbilla, Beintza-Labaien eta Doneztebe—, eta urte osoan zehar astean zortzi saio eskaintzen ditu.

Jarduerak talde txikietan egiten dira, bi ordu eta erdiko saioetan, eta pertsona bakoitzaren behar eta gaitasunen arabera egokitzen dira.

 Gorputza eta burua lantzeko jarduerak

Programa lau lan-bloketan egituratzen da:

• Aktibazio fisiko eta funtzionala, ariketa egokituak, psikometriaren lanketa eta erorketen prebentzioa barne.
• Estimulazio kognitibo eta emozionala, memoria tailerrak, irakurketak, adierazpen emozionala eta erlaxazio teknikak.
• Bizikidetza eta komunitatea, parte-hartze soziala, belaunaldien arteko topaketak eta tokiko memoria berreskuratzea bultzatuz.
• Autonomia eta osasun hezkuntza, ohitura osasungarriei, teknologia digitalari eta adinekoen eskubideei buruzko saioekin.

Jarduera guztiek dute ikuspegi prebentiboa, inklusiboa eta pertsonengan zentratua, eta helburu dute autonomia, ongizate emozionala eta parte-hartze komunitarioa sustatzea.

Genero-ikuspegia ardatz duen proiektua

 Jubilotekako parte-hartzaileen %90 inguru emakumeak dira. Horregatik, proiektuak genero-ikuspegia txertatzen du modu zeharkakoan, emakume adinduen ahalduntzea eta landa-inguruneko emakumeen ekarpenaren aitortza sustatuz, eta gizonak pixkanaka zaintza eta harreman espazioetan parte hartzera gonbidatuz.

Jarduerek autoestimua, lidergoa eta bizitzan zehar egindako zaintza-lanaren aitortza bultzatzen dute, ingurune seguru, berdinzale eta parte-hartzaileak sortuz.

Ongizatea sortzen duen komunitate-espazioa

 2017an abian jarri zenetik, Jubiloteka erreferentziazko gizarte baliabide bihurtu da Malerrekan, adinekoen arteko elkartasun-sarea sendotuz eta bakardade ez-nahiaren prebentzioa sustatuz.

Urtean zehar 60 pertsona baino gehiagok parte hartzen dute, eta jarraipen indibidualizatuari esker ahultasun edo mendekotasun egoerak garaiz detektatzea ahalbideratzen du.

Malerrekako Zerbitzuen Mankomunitateak eskerrak eman nahi dizkie parte-hartzaileei, talde teknikoari eta saioak hartzen dituzten udalei, baita Nafarroako Gobernuari ere, proiektu hau posible egiteagatik eta gure bailarako adinekoen bizitza aktibo, duin eta parte-hartzailearen alde lan egiten jarraitzeagatik.